دیپلۆماسی و سەركردایەتیی كورد

یادداشتێك سەبارەت بە گەشته سیاسی و دیپلۆماسییەكەی هاوڕێ عەبدوڵڵا موهتەدی 
ئارام بوداغی

له حەوتووی كۆتایی مانگی جۆزەرداندا هاوڕێی تێكۆشەر كاك عەبدوڵڵا موهتەدی، سكرتێری كۆمەڵه به مەبەستی گەشتێكی سیاسی و دیپلۆماسی سەردانی ویلایەته یەكگرتووەكانی ئەمریكای كرد. لێرەدا زۆر به كورتی باسی لایەنه گرنگەكانی وتارەكەی هاوڕێ عەبدوڵڵا موهتەدی له زانستگای جۆرج واشێنگتۆن دەكەم. هاوڕێ عەبدوڵڵا لە هەموو كۆڕوكۆبوونەوەكاندا هەوڵی نەداوه تەنیا وەك ڕێبەری كۆمەڵه بدوێ و سیاسەتی حزبەكەی لەوێ پێشكەش بكات. بەڵكوو له ڕاستیدا زۆر به ڕاشكاوی و به دروست تێكۆشا وەك نوێنەری كوردی ڕۆژهەڵات بدوێ كه ئەمە یەكێك له خاڵه بەهێزەكانی دەركەوتنی كاك عەبدوڵڵا بوو له ناوەنده سیاسییەكان و كۆبوونەوەكاندا . هاوڕێ عەبدوڵڵا موهتەدی به دروست و وەستایانه هەوڵیدا بۆشایی نەبوونی "بەره" یا وەڤدێكی هاوبەشی حزبەكانی كوردستانی ئێران پڕ بكاتەوه و چوار دەیه خەبات و تێكۆشانی كوردستانی ئێران دژی سەركوت و جینایەتەكانی ڕژیمی ئیسلامی و داواكارییەكانی گەلی كورد به زمانی سیاسی و ساده بەیان بكات و له ڕاستیدا دەنگی زوڵاڵی كوردی ڕۆژهەڵات بوو. 
تایبەتمەندی و تواناییەكانی خەباتی كوردی ڕۆژهەڵات بەشێك بوون له وتارەكەی هاوڕێ عەبدوڵڵا موهتەدی. خەڵكی كوردستان هەرگیز نەچوونه ژێر باری دەسەڵاتی ڕەهای خومەینی و ڕژیمەكەی. شۆڕش له كوردستان "ئیسلامی" نەبوو بەڵكوو لائیك و سیكۆلار بوو. گەلی كوردی له گشتپرسیی ١٢ی خاكەلێوەی ١٣٥٨ دەنگی "نـا"ی دا به كۆماری ئیسلامی. بۆ ئەودەمی ئێران و تا ئێستاشی لەگەڵ بێ ئەمه تایبەتمەندییەكی بەهێزی خەباتی كورد بوو. بەشداریی گەرموگوڕی ژنان له خەباتی سیاسی و چەكداری و بەربەرەكانێ و وەستانەوه و شەڕی سەنگەراوسەنگەری پێشمەرگەی ژن له بەرامبەر لەشكری ڕیشن و ڕەشبین و ڕەشبیری ئیسلامیی ئێران، له ڕۆژهەڵاتی كوردستانەوه سەرچاوەی گرت و كۆمەڵە ڕچەی شكاند كه ئێستا ئەمه جێی شانازیی هەموو كورد و سەرسووڕمانی بیروڕای گشتیی جیهانه. باوەڕ به یەكسانی ژن و پیاو و خەبات له پێناویدا له زەلكاوی ڕۆژهەڵاتی ناوەڕاستی پیاوسالار و دژە ژن و دواكەوتوو، تایبەتمەندیی پڕشنگداری خەباتی كۆمەڵه و كوردی ڕۆژهەڵاته. خەبات بۆ دێمۆكراسی و ئازادی تایبەتمەندییەكی دیكەی خەباتی كورده له كوردستانی ڕۆژهەڵات. لە ڕۆژهەڵاتی ناوەڕاستی مۆڵگەی ڕژیم و گرووپه دیكتاتۆر و دواكەتوو و توندئاژۆ و تیرۆریستەكان،  كه ڕژیمی ئێران له سەرووی هەموویانەوەیه و ئەم وڵاتانەیان كاول كردووه و دەیانهەزار كەسی بێ تاوان كوژراون و میلیۆنانیش ئاوارەن، شەڕ له پێناو ئازادی و دێمۆكڕاسی و گیان دان لە پێناویدا، كورد له باقیی نەتەوە و دەسەڵات و گرووپەكان جیا دەكاتەوه.  ئازادیی بەیان و دەرچوونی ڕۆژنامە و گۆڤارەكان و پێكهێنانی ڕێكخراوە سیاسی و فەرهەنگی و كۆمەڵایەتییەكان تایبەتمەندییەكی دیكەی نزیكەی ٤ دەیه لەوە پێشی خەباتی كورد بوو. بەهاناوەچوون و یارمەتی گەیاندن بۆ نەتەوەكان و بەشەكانی دیكەی ئێران له لایەن خەڵكی كوردستان و حزبه سیاسییەكانییەوه و پەنادانی حزب و ڕێكخراوەكان و خەڵكی ئاواره و بەهاییەكان تایبەتمەندی و خاڵێكی درەوشاوەی دیكەی خەباتی كورد و هەستی مرۆڤدۆستی و ئازادیخوازییەتی. ئەم تایبەتمەندییانە، خەباتی كوردی له دەسەڵاتی ئاخوندەكانی تاران جیا دەكردەوه كه بەڕێز كاك عەبدوڵڵا ئاماژەی پێ كردن و له ڕاستیدا پێشكەوتوویی و مودێرن بوونی ئەم خەباته دەردەخات كه هێشتاش هەر جێی شانازین. له هەمانكاتدا ڕۆشنبیریی و دوورئەندێشی و وردبینیی سەركردایەتیی سیاسی كورد نیشان دەدات.
بەشێكی دیكەی وتارەكەی بەڕێز كاك عەبدوڵڵا بریتی بوو له هێرشی هێزە سەكوتگەرەكانی ڕژیمی ئیسلامی دوای فەرمانی خومەینی بۆ سەر كوردستان و پەردە لادان لهسەر جینایەتەكانی ڕژیم لەم ٤٠ ساڵەدا و بێ هەڵوێستیی باقیی ئۆپۆزیسیۆنی ئیرانی و جیهانی دەرەوه. له كۆتاییدایشدا بەڕێز كاك عەبدوڵڵا وێڕای داوای یەكگرتوویی هێزە سیاسیەكان، بەرنامە و پلانی كوردی بۆ ئیدارەی ئێرانی دوای ڕووخانی ڕژیمی ئیسلامی خسته ڕوو كه دەبێ ئێرانێكی ئازاد، دێمۆكرات، سیكۆلار، فرەچەشن و فێدڕاڵ بێت كه مافی گشت نەتەوه و كەمینه و بەشە جۆراوجۆرەكان تێیدا ڕەچاوگیرێ و له یاسای بنەڕەتیی وڵاتدا به ڕاشكاوی بگونجێ و نەهێڵین دیكتاتۆرێكی دیكه بێته جێگای ئەم ڕژیمه. له ڕاستیدا وتارەكەی بەڕێز كاك عەبدوڵڵا هیچ ناتەباییەكی لەگەڵ سیاسەتی حزبەكانی كوردستانی ڕۆژهەڵات نییه. 
ئێستا كه ئێران ئاوسی ئاڵوگۆڕە، كوردی ڕۆژهەڵات و حزبەكانی بەم ڕابوردووه بەنرخ و دەوڵەمەند و پێشكەوتووە دەبێ له هەموو كات زیاتر بە خەم و فكری بەرەیەكی یەكگرتووەوه بن. پێكهاتنی ناوەندی هاوكاریی هێزەكانی ڕۆژهەڵات كارێكی باشه بەڵام زۆر كەمه و دەبێ له هەموو ئاستێكی پێشمەرگانه و سیاسی و دیپلۆماسی و ڕاگەیاندنەوه پەرەی پێ بدرێ. بەڕێز كاك عەبدوڵڵا وەك ڕێبەرێكی پڕئەزموون و لێهاتوو، نیشانیدا كە دەتوانێ وتەبێژێكی ئەمین و ئامانەتدار و ئازا و بەهەڵوێست بێ و له هەر كۆڕوكۆمەڵێكدا سەرنجی گوێگر و بەرامبەر بۆ لای خۆی ڕاكێشێ و لێبڕاوانه پارێزگاری له مافی ڕەوای كورد بكات.

PM:05:10:08/07/2018




ئه‌م بابه‌ته 248 جار خوێنراوه‌ته‌وه‌‌