تكایە با ئاوەكە لێڵتر نەكرێت!

بیژەن قوبادی

پاش رووداوە نەخوازراو و كارەساتبارەكەی بناری هەڵگورد و هەڵوێست و دەركەوتەكانی چەند راستیەك بە زەقی خۆیان ئەنوێنن و  نیشاندەری ئەو راستیەن كە تا چەندە لەم دۆخە هەستیارەدا دوژمنانی كورد و دەست و پێوەندە شاراوە و ئاشكراكانی و لە سەرەوەی هەموویانەوە كۆماری ئیسلامیی ئێران تا چەندە مەڵازیان گرتووە و لە كەمیندان بۆ قۆستنەوەی هەلەكان و چاندنی تووی چەند بەرەكی و پیلان گێڕی بە دژی گەلی كوردستان بە گشتی. 
رق و قینەی كۆماری پەت و سێدارە و ئەشكەنجە و زیندان پێشینەیەكی مێژوویی هەیە و هەڵ ئەگەڕێتەوە بۆ چوار دەیە پێشتر و لە یەكەم هەنگاودا سەر دەنەنەواندن و داوی مافی پێشێلكروای خۆ كردن، دووهەمین هەنگاو بەشداری نەكردن و بایكوتی بەناو گشتپرسیی ١٢ی خاكەلێوەی ١٣٥٨ و دواتر بەربەركانێ و خەبات لە پێناو پاراستنی خۆی و بەرنگار بوونەوەی جەماوەری لە بەرانبەر لەشكری تاران دا و پێشەنگ و سەرتۆب بوونی گەلی كورد لە گشت بەستێن و بوارەكانی خەباتی مەدەنی، ژینگە پارێزی، مندالپارێزی، ژنان، كرێكاران، خوێندكاران، رێكخراوە پیشەیی و مەدەنیەكەن و .... 
ئەمانە هیچكامەیان بە ئیشتیا و مەیلی كۆماری ئیسلامی نین و لە قامووسی ئەو دەسەڵاتەدا ناگونجێن. بۆیە بە درێژایی تەمەنی خۆی لە هیچ كردەوە و پلان و پیلان و پیلانگێڕیەك بە دژی ئەو خەڵكە خۆی نەبواردووە و خۆی نەپاراستووە. لە تیرباران كردنە بە كۆمەڵەكانی دەیەی شەستەكان تا گرتن و زیندانی كردن و ئەشكەنجە و بێ سەروشوێن كردنی بیرجیاوازان، هەڵسووڕاوان و چالاكانی مەدەنی، كۆمەڵایەتی، سیاسی و .... تا كۆچی زۆرەملیی و دوور خستنەوە و راونانی دانیشتووانی شار و دیێ كوردستان، سووتاندن و خاپوور كردنی گوندەكان، ئاور تێبەردان و شێواندنی ژینگە و سروشتی كوردستان، برەبەست دانان و و گۆڕینی ڕێڕەوی سروشتیی چۆم و رۆبارەكان و گواستنەوەیان بەرە و شوێنی مەبەست و تێكدانی سروشتی ناوچەو .... نموونەهایەكی بچووكن لە دوژمنایەتیی ئەو رژیمە بەرانبەر بە كورد بە گشتی.
ئەمڕۆش كۆماری ئیسلامی هەر ئەو دەسەڵاتەیە بەڵام ئیتر كاڵ و كرچ نیە و ئەزموونی چوەار دەیە دەسەڵات دارەتیی هەیە و شێوازی پیالنگێڕی و دوژمنكاریەكانی بەرۆژ ئەكاتەوە.
رووداوی نەخوازراوی باڵەكایەتی لەوانەیە رووداوێكی بە هەڵكەت بێت، بەڵام كۆماری ئیسلامی لەو هەلە كەڵكی وەرگرت و بە نیازە بە هەر رێگایەكەوە بۆی بلوێت مەبەستەكانی خۆی بپێكێت. 
ئەگەر چاوێك بە سەر ماڵپەرە رەنگاورەنگەكانی سەربە دام و دەزگا و ناوەندە هەواڵگریەكانی كۆماری ئیسلامیدا بخشێنین، پێیان وایە شەوی بەراتیانە. دوژمن پیلانگێڕە و زاتی ئەوەیە بەڵام پێویستە لەم چركەسات و دۆخە هەستیار و مێژوویەدا كە بۆ كورد بە گشتی رەخساوە، هەموو تاكێكی دلسۆزی كورد بە هەست بە بەرپرسایەتی كردن نەخوازراو نەبێتە سووتەمنی و چیلكەی ئاگر خۆش كردنی دوژمن. 
لەم ماوەیەدا دەركەوت كە خەمخۆرانی بزاوتی كورد چەندە پەرۆشی ئەو بابەتەن و هەڵوێست و راو بۆچوونەكانیان  دەری خست كە هەستی نەتەوایەتی لە چ ئاستێكی بەرز و پیرۆزدایە.
بەڵام بەداخەوە لەم ناوەدا كۆمەڵیك كەسانی كەم ئەزموونی كورت بین بە پەیڕەو كردنی بڕێك هەست و ئێحساساتی كاڵ و كرچی كاتی لە سەر لاپەڕە بێ چفت و بەست و درگا و دەروازەكانی دنیای مەجازی كۆمەڵێك باس و بابەتیان ورووژاند  كە دوژمن ئەتوانێت لەو كاناڵەوە  وەكو مار خۆی تێ خزێنێت و دنە دنەی بدات.
بۆیە پێویستە تاك تاكی ئێمە بە هەست بە بەرپرسایەتی كردن و رووانین بۆ دووتر و بە دەر لە ئەتمۆسفری تۆزاوی و شێوێندراوی ئەم یەك حەفتەیە بجووڵینەوە و هەڵس و كەوت بكەین.
بە لەپێش گرتنی ئەم روانینە هەم رێگامان بۆ دەستێوەردانی دوژمن داخستووە، هەم برایەتی و یەكریزیی كوردمان پاراستووە، هەم تەم و مژی سەر رووداوەكە رەواوەتەوە و رووی راستەقنینەی بابەتەكەمان بۆ دەر ئەكەوێ.
بۆیە با مەجال نەدەین سنوورە دەسكردەكان لەمپەربن لە بەر تەبایی و یەكریزیمان و ئاوەكە لێڵتر نەبێت تا هەرچی زووتر بنی گۆمەكە بە روونی خۆی دەر بخات.


AM:10:47:03/09/2017




ئه‌م بابه‌ته 79 جار خوێنراوه‌ته‌وه‌‌