دوو تەقینەوەی گوماناوی دیکە لە تاران و یەزد ڕوویدا

لە درێژەی زنجیرە تەقینەوە گوماناوییەکانی ڕۆژانی ڕابردوو لە ناوەندە ئەتۆمی، سەربازی و گشتییەکانی ئێران، سەرلە بەیانی ئەمڕۆ سێشەممە، ١٧ی پووشپەڕ، تەقینەوەیەک لە شارۆچکەی پیشەیی باقرشار، هەڵکەوتوو لە باشووری تاران ڕوویدا کە بە هۆیەوە دوو کەس کوژران و سێ کەسیتریش برینداربوون.

بە وتەی سەرچاوەکانی هەواڵ، دەنگی تەقینەوەکە بە شێوەیەک بەهێز بووە کە چەندین کیلۆمەتری ئەولاتر هەست پێکراوە و خەڵکی تووشی ترس و دڵەڕاوکێ کردووە. بەرپرسانی کۆماری ئیسلامیش وەک هەمیشە بۆ پۆشینی ڕووداوەکە هۆکاری تەقینەوەکەیان بۆ کەمتەرخەمی لە پڕکردنەوەی کەپسولی ئۆکسیژن گەڕاندۆتەوە.

هاوکات، ڕاپۆرتەکان باس لەوە دەکەن کە لە ناوەندی ئۆرانیۆمی ڕەزایی نژاد، کە پەیوەندی بە بەرنامەی ئەتۆمی ئێرانەوە هەیە، لە مەیبەد هەڵکەوتوو لە پارێزگای یەزد، تەقینەوەیەکی گەورە ڕوویداوە.

 لە ڕۆژان و هەفتەکانی ڕابردوودا، چەندین جار شایەدی تەقینەوە و ئاگرکەوتنەوە لە ناوەندە ئەتۆمی و سەربازییەکانی کۆماری ئیسلامی بووین کە لە گرینگترینیان دەکرێ ئاماژە بە ناوەندی ئەتۆمی نەتەنز لە تاران بکەین کە بەرنامە و چالاکییەکانی ئەم ناوەندەی تووشی کێشەی گەورە کردووە.

AM:11:01:07/07/2020




ئه‌م بابه‌ته 216 جار خوێنراوه‌ته‌وه‌‌