دیپلۆماسیی کورد و پێویستییەکانی سیاسەت لەم سەردەمەدا

سۆران سەلیمی

له‌ وتارەکەی پێشووم (ئاسۆر ڕۆژهەڵات ژمارەی 153)دا ئاماژە‌م کرد به‌ گرنگ بوونی دیپلۆماسی وه‌ک که‌ره‌سته‌یه‌ک له ‌به‌رده‌ست گه‌لی کورد بۆ پێشبردنی ئامانجه‌کانمان و ته‌نانه‌ت ده‌سته‌به‌رکردنیان له‌ ڕێگای ڕێکه‌وتن له‌گه‌ڵ هێزه‌کانی ئۆپۆزیسیۆن و به‌تایبه‌تی حیزبەکانی سه‌ر به‌ نه‌ته‌وه‌ بنده‌سته‌کان و ئه‌و هێزانه‌ی باوه‌ڕیان به‌ ڕووخانی کۆماری ئیسلامی هه‌یه‌. له‌م وتاره‌دا ده‌مه‌وێت ئاماژە به‌ چه‌ند خاڵی پەوه‌ست به‌ پێوه‌ندی و‌ ڕێکه‌وتن و لێکتێگه‌یشتن له‌ نێوان کورد و لایه‌نه‌کانی دیکەدا‌ بکه‌م.‌

ڕوونه‌ یه‌که‌م ئاستی دانوستان و لە ‌ڕاستیدا گرنگترین هه‌نگاو بۆ سه‌رکه‌وتن له‌و بواره‌دا شێوازی پێوه‌ندیی نێوان خودی لایه‌نه‌ کوردیه‌کانە واته‌ ئێمه‌ی کورد کاتێک ده‌توانین له‌سه‌ر مێزی دانوستان له‌گه‌ڵ لایه‌نه‌کانی دژبه‌ری کۆماری ئیسلامی خاوه‌ن هێزی "بڕوا به‌خۆبوون"بین که‌ دڵ و مێشکمان له‌ ناو ماڵی خۆماندا قایم بێت. کورد دەبێت لە ‌یه‌که‌م هه‌نگاودا له‌ ناو خۆی ڕێک بکه‌وێت و حیزبە کوردییەکان بگه‌نه‌ ئه‌و قه‌ناعه‌ته‌ که‌ ته‌نیا ڕێگای سه‌رکه‌وتنمان –چ له‌ ڕەوتی ڕووخاندنی کۆماری ئیسلامی و چ دواتر_گه‌یشتن به‌ ڕێکه‌وتنێکی دڵنیاکه‌ره‌وه‌ و پته‌وه،‌ که‌ هه‌م له‌ کاتی ئێستادا بتوانێت ئێمه‌ی کورد وه‌کوو یه‌ک هێز و یه‌ک لایه‌ن بنوێنێت و هه‌م له‌ داهاتوودا پێش به ‌هه‌رجۆره‌ کاره‌ساتێکی نه‌ته‌وه‌یی وه‌کوو شه‌ڕی ناوخۆیی یان ته‌نانه‌ت په‌رته‌وازه‌یی و لاوازیمان بگرێت. حاشای لێ‌ناکرێت که‌ به‌شی زۆری حیزبەکانی کوردستان لانیکه‌م له‌ پرسی نه‌ته‌وه‌ییدا خاوه‌ن یه‌ک هه‌ڵویست و ته‌نانه‌ت یه‌ک به‌رنامه ‌و ستراتێژین_ بە هەندێک جیاوازیی بچووکەوە_ و ڕەنگه‌ ته‌نیا تاکتیکی جیاوازیان هه‌بێت. که‌وایه‌، بۆ هه‌ر لێکۆڵه‌رێکی ده‌ره‌کی که‌ له‌ ده‌ره‌وه‌ی کورد تماشای بارودۆخی ئێستای کوردستانی ڕۆژهه‌ڵات بکات بۆی جێگای سه‌رنج ده‌بێت ئه‌ی بۆچی ئه‌و گه‌له‌ بنده‌سته‌ هه‌تاکوو ئێستا و دوای سه‌دان ساڵ خه‌بات هێشتا په‌رته‌وازه‌یه‌ و خه‌باتی نه‌ته‌وایه‌تی له‌ژێر کاریگه‌ریی حیزبایه‌تی دایە‌، دیارده‌یه‌ک که‌ به‌ پێچه‌وانه‌ی هه‌موو نۆرمه‌کانی مێژووی کۆن و هاوچه‌رخی گه‌لانی دیکه‌یه‌. گومانی تێدا نییە‌ کە له‌ ئاست ئۆپۆزیسیۆنی ناوه‌ندگه‌رای دژبه‌ری کۆماری ئیسلامیدا، په‌رته‌وازه‌بوونی کورد و دووبه‌ره‌کیی نێوان لایه‌نه‌ کوردیه‌کان به‌ باشترین ده‌رفه‌ت و هه‌لومه‌رج ده‌زانن بۆ ئه‌وه‌ی که‌ گوتاری ناوه‌ندگه‌رایی و درێژەدان به‌ سیستمی داگیرکه‌ری پێش بخەن و دڵنیابن له‌وه‌ی که‌ له‌و هه‌لومه‌رجه‌ی ئێستادا نه‌ ده‌نگی کورد به‌ ته‌واوه‌تی ده‌گاته‌ هه‌موو که‌س و نه‌ ئه‌وه‌یکه‌ کورد خاوه‌نی ئه‌و هێزیه‌ که‌ بتوانێت له‌ ئاڵۆگۆڕەکانی داهاتوودا به‌رگری له‌ خواستی خۆی و بوون و شوناسی خۆی بکات. له‌م نێوانه‌دا ئه‌زموونی ده‌ ساڵی یه‌که‌می دوای سه‌رکه‌وتنی شۆڕشی گه‌لانی ئێرانیش له‌به‌رده‌ستی واندایه‌ و ده‌زانن به‌ دووپات بوونه‌وه‌ی هه‌مان هه‌لومه‌رج سه‌رکوتی بزووتنه‌وه‌ی کوردستان دیسان زۆر دژوار نابێت. له‌م نێوانه‌دا خاڵێکی دیکه‌ هه‌یه‌ که‌ گرنگیی کوردستان و پێگه‌ی ستراتێژیکی له‌ ڕەوتی ئاڵۆگۆڕە‌کان بۆ لایه‌نی ناوه‌ندگه‌را ده‌سه‌لمێنێ و بۆیه‌ ئه‌وان پێیان خۆشه‌ کورد هه‌ر وه‌کوو جاران په‌رته‌وازه‌ بمێنێتەوە، ئه‌ویش ئه‌وه‌یکه‌ کورد ته‌نیا هێزی ڕێکخراو و به‌ ئه‌زموونه‌ له‌ نێوان هه‌موو نه‌ته‌وه‌ بنده‌سته‌کانی ئێراندا، خاوه‌ن لانیکه‌م ٤٠ ساڵ خه‌باتی خوێناوی دژی کۆماری ئیسلامیه‌، خاوه‌ن ئه‌زموونی خه‌باتی چه‌کداریه‌، خاوه‌ن خه‌باتی مه‌ده‌نیی زێڕینه‌ و به‌ هه‌موو په‌رته‌وازه‌ییشه‌وه‌ له‌ کاتی ئێستادا خاوه‌ن به‌هێزترین و ڕێکخراوترین ته‌شکیلاتی نهێنین له‌ ناوخۆی کوردستان. بۆیه،‌ هه‌رجۆره‌ یه‌کگرتوویه‌کی کورد ده‌توانێت هێزه‌که‌ی به‌ شێوه‌یه‌کی سه‌رسووڕهێنه‌ر زیاد بکات و ته‌نانه‌ت گرنگتر ئه‌وه‌یکه‌ ده‌بێته‌ سەرچەشن و هه‌وێنێک بۆ نه‌ته‌وه‌کانی دیکه‌ که‌ کوردستان وه‌کوو "ماڵه‌باوان" ڕەچاوی بکه‌ن و بکه‌ونه‌ ژێر کاریگه‌ریی خواست و عه‌قڵیه‌تی نه‌ته‌وه‌گه‌را و شوناسخوازانه‌ی کوردەوە. خوێندنه‌وه‌ و وانه‌گرتن له‌ ئه‌زموونی وڵاتان و نه‌ته‌وه‌کانی دیکە_ هه‌ڵبه‌ت نه‌ک له‌ ڕوانگه‌یه‌کی مارکسیستی_ ده‌توانێت زۆر ئاسانکاریمان بۆ بکات. به‌ده‌ر له‌ هه‌لومه‌رجی جیاوازی نێوان بزووتنه‌وه‌ی ڕزگاریخوازانه‌ی کورد و نه‌ته‌وه‌کانی دیکه‌، لە ڕاستیدا ڕوون و ئاشکرایه‌ که‌ نه‌ته‌وه‌ب نده‌سته‌کان له‌ سه‌ده‌ی بیسته‌مدا به ‌تایبه‌ت ئه‌و کات توانیان له‌ ژێر چه‌پۆکی داگیرکه‌ری ڕزگاریان بێت که‌ ناوماڵی خۆیان ڕێکخست و به‌ یه‌ک ده‌نگ و هه‌ڵویست به‌ره‌وڕووی داگیکه‌ر بوونه‌وه‌، واته‌ پێکهێنانی یه‌ک به‌ره‌وه‌ و یه‌ک بزوتنه‌وه‌ی نه‌ته‌وه‌یی یه‌کگرتوو و هه‌ڵبه‌ت ڕوونتره‌ که‌ به‌ پێچه‌وانه‌وه‌ هه‌میشه‌ شکست ته‌نیا ده‌ره‌نجامی بزووتنه‌وه‌یه‌کی په‌رته‌وازه‌ بووه‌. نموونه‌ی هه‌ره‌ زه‌ق و نزیکی ئه‌و ڕاستیه‌ پرسی فەلستین و ئیسرائیله‌، کاتێک له‌ ده‌ستپێکی ساڵه‌کانی ٩٠ له‌ نێوان "عه‌ره‌فات" و "ئیسحاق ڕابین" ڕێکه‌وتن کرا جیهان به‌ جۆرێک شۆک ببوو ته‌نانه‌ت ئیسرائیلیه‌کان له‌ زۆرێک له‌ خواسته‌کانی خۆیان ته‌نازولیان کرد بۆ ئه‌وه‌یکه‌ دوای ٤٠ ساڵ شه‌ڕ و قه‌یران و کاره‌سات بگه‌نه‌ ڕێکه‌وتن و ئاشتیه‌کی سه‌قامگیر به‌ڵام به‌داخه‌وه‌ دواتر ناکۆکیی ناوماڵی خودی فەلستینیه‌کان و به‌تایبه‌ت له‌ لایه‌ن گرووپه‌ ئیسلامیه‌کانی ده‌سته‌مۆی وڵاتانی ده‌ره‌کی و یه‌ک له‌وانه‌ کۆماری ئیسلامی هه‌موو ده‌رفه‌ته‌کانی پووچه‌ڵ کردەوە و به‌شی زۆری خاڵه‌کانی ڕێکه‌وتنه‌که‌ ته‌نیا به‌ نووسراوه‌یی مایه‌وه‌. ئیسرائیل له‌ ده‌ره‌نجامی نایه‌کگرتوویی فەلستینیه‌کان و ته‌وژمی ڕادیکاڵیزمی ئیسلامی و به‌ناو پاراستنی ئاسایشی خۆی، پڕۆژە‌ی شاره‌کسازیه‌کانی پەرەپێدا و دۆخه‌که‌ گه‌یشته‌ ئه‌و هه‌لومه‌رجه‌ نادیاره‌ی ئێستا که‌ ده‌یبینین. به‌کرده‌وه‌ ئه‌و ڕاستیه‌ سه‌باره‌ت به‌ کوردیش جیاوازیه‌کی ئه‌وتۆی نییه‌ و ته‌نیا سه‌لمێنه‌ری ئه‌و ڕاستیه‌یه‌ که‌ نه‌ته‌وه‌بنده‌سته‌کان ته‌نیا به‌ یه‌کگرتوویی ناوخۆیی و هه‌ڵبه‌ت به‌ پێڕەو کردنی پڕاگماتیزمێکی سه‌رده‌میانه‌ و دوور له‌ "ئایدیالیزم"ێکی ڕووت ده‌توانن ببنه‌ خاوه‌ن هێزێکی کاریگه‌ر و یه‌کلاکه‌ره‌وه‌.

دووهه‌م، پێوه‌ندیه‌کانی ئێمه‌یه‌ له‌گه‌ڵ نه‌ته‌وه‌ بنده‌سته‌کانە و پێشتریش ئاماژە‌م پێکردووه‌ و له‌که‌س شاراوه‌ نییە کورد ته‌نیا نه‌ته‌وه‌ی بنده‌سته‌ که‌ خاوه‌ن حیزبی به ‌ئه‌زموون به‌ پێگه‌ی جه‌ماوه‌ریی به‌رچاوه‌. له‌ دوای هاتنه‌ سه‌رکاری کۆماری ئیسلامیش کوردستان ته‌نیا به‌شێکه‌ که‌ نزیک به‌ ١٥ ساڵ شه‌ڕی چه‌کداریی به‌رده‌وامی به‌سه‌ردا سه‌پا و حیزبه‌کان و گه‌لی کورد ناچار کران به‌ شێوه‌ی چه‌کداری به‌ره‌وڕووی هێزی داگیرکه‌ر ببنه‌وه‌. ده‌بینین دواتریش ته‌نانه‌ت هه‌ر هه‌مان هێز له‌ شه‌ڕی دژی "داعش" به‌شداری ده‌کات و ئه‌زموونێکی دیکه‌ ورده‌گرێت. جگه ‌له‌وه‌ش دوور لە هەر چەشنە گەورە نواندنەوەیەک کورد ته‌نیا نه‌ته‌وه‌یکه‌ که‌ حیزبه‌کانی خاوه‌ن ته‌شکیلاتی نهێنیی کارامه‌ و به‌ئه‌زموون و تۆڕێکی به‌ربڵاوی نهێنی له‌ لایه‌نگران و ئه‌ندامانی نهێنین که‌ له‌ کاتی هه‌ر جۆره‌ ئاڵۆگۆڕێکدا ده‌توانن ببنه‌ ته‌نانه‌ت یارمه‌تیده‌ر بۆ نه‌ته‌وه‌کانی دیکه‌ یان ئه‌زموونه‌کانی خۆیان له‌به‌رده‌ستی ئه‌وان دانێن. واته‌ له‌چاو نه‌ته‌وه ‌بنده‌سته‌کانی دیکه‌ کورد وه‌کوو لایه‌نێکی خاوه‌ن پرێستیژی سیاسی و ڕێکخراوه‌ییه‌ که‌ ده‌توانێت جێگای متمانه‌ و ته‌نانه‌ت کۆڵه‌که‌ی شۆڕشی نه‌ته‌وایه‌تیی هه‌موو نه‌ته‌وه‌ بنده‌سته‌کان ببێت، ئه‌وه‌ش له ‌کاتێکدایه‌ ڕۆژهه‌ڵاتی کوردستان خاوه‌ن "پشت جه‌بهه‌یه‌کی" تایبه‌ته‌ -باشووری کوردستان- که‌ ڕە‌نگه‌ له‌ کاتی ئێستا و له‌به‌ر هه‌لومه‌رجی سیاسی و ژیۆپۆلێتیکیی ناوچه‌که‌ نه‌توانێت ڕۆڵێکی ئه‌رێنی بگێرێت لە پێناو کوردی ڕۆژهه‌ڵاتدا به‌ڵام له‌ داهاتووی دوای کۆماری ئیسلامیدا هه‌موو هاوکێشه‌کان گۆڕانێکی بنه‌ڕە‌تیان به‌سه‌ردا دێت. له ‌ده‌ره‌نجامی هه‌موو ئه‌و خاڵانه‌ و فاکتانه‌دا، کورد له‌ دوای ڕێکخستنی ناوماڵی خۆی ده‌توانێت ناوماڵی نه‌ته‌وه ‌بنده‌سته‌کانیش ڕێک بخات و له‌و پرۆسه‌دا ڕۆڵی سه‌ره‌کی و ناوه‌ندیی هه‌بێت. ڕاسته‌ هێندێک کار کراوه‌ له‌وانه‌ دامه‌زراندنی "کونگره‌ی میللیه‌ته‌کانی ئێرانی فێدراڵ"، به‌ڵام ڕاستی ئه‌وه‌یه‌ ئه‌وه‌ هه‌نگاوێکی پێویست و باشه‌ به‌ڵام به‌س نییه‌. کورد ده‌توانێت به‌ چالاک کردنی ئه‌و ناوه‌نده‌ و له‌ ڕێگای پێکهێنانی به‌ره‌یه‌کی به‌رینی نه‌ته‌وه ‌بنده‌سته‌کان و له‌سه‌ر ئه‌ساسی "شوناسخوازیی نه‌ته‌وایه‌تی و دێمۆکراسیخوازی" ئه‌رکی خۆی له‌ ڕە‌وتی گۆڕانی بنه‌ڕەتی له‌ ئێران و مسۆگه‌رکردنی خواسته‌کانی خۆی و نه‌ته‌وه‌کانی دیکەدا‌ به‌جێ بهێنێت. هه‌مووی ئه‌و ئامانجانه‌ش ته‌نیا به‌ ئه‌کتیڤتر بوونی دیپلۆماسیی کورد له‌گه‌ڵ ئه‌و لایه‌نانه‌ دەکرێت. بۆیە، حیزبه‌ کوردیه‌کان ده‌بێت خێراتر، چڕوپڕتر و کاریگه‌رتر له‌و بواره‌دا هه‌نگاو هه‌ڵێنن. له‌بیر نه‌که‌ین ئه‌گه‌ر نه‌ته‌وه‌ بنده‌سته‌کان یه‌کگرتوو و یه‌کده‌نگ بن و هێزی خۆیان یه‌ک بخه‌ن بێگومان به‌رگری له‌ ماڵ و گیان و حاڵی هه‌موو نه‌ته‌وه‌ بنده‌سته‌کان و پاراستنیان له ‌به‌رامبه‌ر هێزی ناوه‌ندگه‌رای داهاتوودا هاسانترە و ئه‌زموونی دوای ١٣٥٧ و بەته‌نیا مانه‌وه‌ی کورد باشترین وانه‌یه‌ له‌و بوواره‌دا.

سێهه‌م، باسی پێوه‌ندیی ئێمه‌ی کورده‌ لەگه‌ڵ ئه‌حزابی سه‌ر به‌ نه‌ته‌وه‌ی "فارس"_ که‌ به‌هه‌ڵه‌ به‌ حیزبە سەراسەرییەکان ناوزه‌د ده‌کرێن. له‌نێوان ئه‌واندا ڕە‌نگه‌ چه‌ند گرووپێکی بچووک هەبن که‌ دان به‌ مافه‌کانی نه‌ته‌وه ‌بنده‌سته‌کاندا بنێن و ته‌نانه‌ت باوەڕیان به‌ فێدراڵیزم هه‌یه‌ که‌ هه‌ڵبه‌ت پێناچێت ژماره‌یان زۆر بێت به‌ڵام زۆربه‌یان له‌ دوو به‌ش پێک هاتوون یان باوه‌ڕێکی پته‌ویان به‌ ناوه‌ندگه‌رایی و یه‌ک وڵات و یه‌ک نه‌ته‌وه‌ هه‌یه‌ یان هنەدێکیان باوەڕیان به‌ جیاوزییه‌ ئێتینیکی و زمانیه‌کان هه‌یه‌ به‌ڵام سیستمی فێدراڵی به‌ هه‌وێنی پارچه‌پارچه‌ بوونی ئێران ده‌زانن و بڕێوه‌بردنی کاروباری وڵات نه‌ک به‌ شێوه‌ی ناوه‌ندخوازانە به‌ڵکوو له‌ چوارچێوه‌ی پارێزگا به‌ پارێزگا و به‌ ده‌سه‌ڵاتی زۆر به‌رته‌سکی خۆجه‌یی باشترین مۆدێڵ ده‌زانن بۆ ئێرانی داهاتوو. ڕاستی ئه‌وه‌یه‌ سیاسه‌ت له‌سه‌ر عه‌رزی واقێعدا ده‌کرێت، ئێمه‌ی کورد ناتوانین هه‌تاهه‌تایه‌ خۆمان له‌و لایه‌نانه‌ دوور بگرین و هه‌ر له‌ دووره‌وه‌ بڵێین ئێمه‌ سه‌ربه‌خۆییمان ده‌وێت، ئێمه‌ فیدڕاڵیمان ده‌وێت و نامانه‌وێ له‌گه‌ڵ ئێوه‌ هیچ هاوکاری و وتووێژێکمان هه‌بێت. ڕێبه‌رانی سیاسیی گه‌لی کورد ناتوانن و نابێت ته‌نیا بەپێی هه‌ست و ئیحساسه‌وه‌ هه‌ڵسوکه‌وت بکه‌ن به‌ڵکوو ده‌بێت له‌ هه‌نگاوییەکەمدا به‌ باشترین شێواز له‌ ده‌رفه‌ته‌کان بۆ گۆڕان و ڕووخاندنی کۆماری ئیسلامی که‌ڵک وه‌رگرن و له ‌هه‌نگاوی دووهه‌مدا پارێزگاری له‌ خواسته‌ نه‌ته‌وایه‌تی و بزووتنه‌وه‌ی ڕزگاریخوازانه‌ی گه‌له‌که‌مان بکه‌ن. بێگومان ئێمه‌ی کورد لەگه‌ڵ "پان ئێرانیست"ێکی ناوه‌ندگه‌را جیاوزیه‌کی حاشاهه‌ڵنه‌گر و قووڵمان هه‌یه‌ به‌ڵام لانیکه‌م له‌یه‌ک خاڵدا هه‌موومان هاوبه‌شین که‌ کۆماری ئیسلامی ده‌بێت بڕووخێت تا ئه‌و ده‌سه‌ڵاته‌ له‌سه‌رکار مابێت هێچ جۆره‌ ئاڵۆگۆڕێک چ به‌ قازانجی ئێمه‌ و چ به‌ قازانجی ئه‌وان نایته‌ دی و به‌دی ناکرێت. بۆیه،‌ کۆماری ئیسلامیش به‌ ئاگاداری له‌و ڕاستیه‌ هه‌موو هەوڵێک دەدات که‌ هیچ جۆره‌ لێکتێگه‌یشتن و نێزیکبوونه‌وه‌یه‌ک له‌ نێوان نه‌ته‌وه‌ بنده‌سته‌کان و به‌تایبه‌ت گه‌لی کورد له‌گه‌ڵ لایه‌نه‌کانی ئۆپۆزیسیۆنی ناوه‌ندگه‌را نه‌یته‌ پێشه‌وه‌. له ‌وه‌ها هه‌لومه‌رجێکدا ئێمه‌ی کورد نابێت ته‌نیا به ‌دروشم و ترس و دڵەڕاوکێ له‌ فرت و فێڵی ئه‌و لایه‌نانە خۆمان دوور بگرین و پێمان وابێت هه‌ر چه‌شنه‌ هاوکاریه‌ک له‌گه‌ڵ ئه‌واندا به‌ مانای له‌ده‌ستدانی پرە‌نسیپه‌ نه‌ته‌وایه‌تیه‌کانمانه‌. ئه‌وه‌ له‌ مه‌نته‌قی سیاسه‌تدا هیچ جێگایه‌کی نییه‌ و ته‌نانه‌ت ئه‌گه‌ر دروشمی ستراتێژیکی هه‌موو کوردێکی ڕۆژهه‌ڵاتی "سه‌ربه‌خۆیی"ش بێت دیسانه‌وه‌ تا کۆماری ئیسلامی نەڕووخێت هیچ ده‌سکه‌وتێکمان نابێت و بێگومان کوردیش به‌ تاقی ته‌نیا قه‌ت ئه‌و هێزه‌ی نییە که‌ حکوومه‌تی ناوه‌ند بگۆڕێت.

له‌ کۆتایی باسه‌که‌دا ده‌مه‌وێت ئاماژە‌ به‌وه‌ بکه‌م که‌ له‌سه‌ر کورد پێویسته‌ پەرە به‌ "قووڵایی ستراتێژیکی شوناسخوازی"ی خۆی بدات له‌ پانتای ئه‌و وڵاتەدا‌ که‌ پێی ده‌ڵێن ئێران، واته‌ ده‌بێت هه‌لومه‌رجێک بخولقێنێت که‌ هاوسۆزیی هه‌موو پێکهاته‌کانی ئێرانی ئێستا له‌گه‌ڵ خواست و مافه‌کانی ئێمه‌ بگاته‌ به‌رزترین ئاست، واته‌ زۆربه‌ی دانیشتووانی ئێران بگه‌نه‌ ئه‌و قه‌ناعه‌ته‌ که‌ به‌بێ ڕەچاوکردنی مافی نه‌ته‌وه‌کان و یه‌ک له‌وانه‌ کورد، ئێرانی داهاتوویش ئه‌گه‌ر له‌ ئێستا خراپتر نه‌بێت باشتر نابێت و ئه‌و ئامانجه‌ش ته‌نیا له‌ ڕێگای یه‌کخستنی ناو ماڵی خۆمان له‌ هه‌نگاوی یه‌که‌م و دووهه‌میش به‌ وتووێژ و کاریگه‌ریی له‌سه‌ر لایه‌نه‌ ئێرانیه‌کان ده‌کرێت و دێته‌ دی.



PM:10:03:06/08/2018




ئه‌م بابه‌ته 367 جار خوێنراوه‌ته‌وه‌‌