ڕێوڕەسمی نەورۆز لە بارەگای ناوەندیی كۆمەڵە بەڕێوەچوو

ئاسۆی ڕۆژهەڵات: ئێوارەی ئەمڕۆ سێشەممە، ٢٩ی ڕەشەممە، بە بۆنەی هاتنی نەورۆز و ساڵی نوێی كوردی ڕێوڕەسمێكی بەشكۆ بە بەشداری ژمارەیەك كەسایەتی سیاسی، كادر و پێشمەرگە و ئەندامانی سەركردایەتی كۆمەڵە، لە بارەگای ناوەندیی كۆمەڵە بەڕێوەچوو.

سەرەتای ڕێوڕەسمەكە بە پارچە شێعرێك لە لایەن پێشكەشكارانی ڕێوڕەسمەكە (ئیدریس عەبدی و سەرگوڵ خودایار) و چەند ساتێك بێ دەنگی بۆ ڕێزگرتن لە یادی ئازیزی سەرجەم گیانبەختكردووانی كۆمەڵە و بزووتنەوەی شۆڕشگێڕانەی كوردستان دەستیپێكرد.

پاشان ئاگری نەورۆز لە لایەن هاوڕێ عەبدوڵڵا موهتەدی سكرتێری گشتیی كۆمەڵە كرایەوە.

لە درێژەی ڕێوڕەسمەكەدا هاوڕێ ئەردەڵان فەرەجی بە ناوی كومیتەی ناوەندیی كۆمەڵەوە بەخێرهاتنی میوانەكانی كرد و قسەوباسێكی كورتی پێشكەش كرد.

دواتر هاوڕێ سەعدی موعەزز، سروودبێژی دەنگخۆشی ناو ڕیزەكانی كۆمەڵە سروودی نەورۆزی پێشكەش بە ئامادەبووانی ڕێوڕەسمەكە كرد.

لە كۆتایی بەشی یەكەمی ڕێوڕەسمەكەدا هاوڕێیەكیتری دەنگخۆشی ناو ڕیزەكانی كۆمەڵە، هاوڕێ سەركەوت مەلوودی بەرهەمێكیتری نەورۆزی پێشكەش كرد.

بەشی دووهەمی ڕێوڕەسمەكەش كە بۆ شادی و خۆشی ئامادەبووان تەرخان كرابوو تا درەنگانی ئێوارە درێژەی كێشا و بەم شێوەیە ڕێوڕەسمەكە لە كەش و هەوایەكی بەهاری دا كۆتایی پێهات.

PM:11:39:20/03/2018




ئه‌م بابه‌ته 1460 جار خوێنراوه‌ته‌وه‌‌