دەربارەی دەوری میدیا و تۆڕە كۆمەڵایەتییەكان

وتووێژ لەگەڵ موختار ئەحمەدی، ئەندامی كومیتەی ناوەندی و ئیدریس عەبدی، جێگری كومیتەی ناوەندیی كۆمەڵە 

پرسیار: هەموو حیزبێكی سیاسیی كە بۆ دەسەڵات تێدەكۆشێت هەوڵ دەدات لە ڕێگەی جۆراوجۆرەوە زۆرترین خەڵك لەگەڵ خۆی بخات و ئەو جەماوەرە لەناو ڕیزەكانی خۆیدا ڕێكبخات. یەكێك لەو ڕێگەیانە پرۆپاگاندا یان تەبلیغاتە. بەڕای ئێوە پروپاگاندا یان تەبلیغات لە كۆمەڵەدا چەندە گرینگە؟
وڵام: بۆ وڵامدانەوە بەم پرسیارە دەبێت ئاماژەیەكی مێژووی بكەین كە هەزاران ساڵە پڕوپاگەندە بوونی هەبووە و مێژووەكەی هەڵدەگەڕێتەوە بۆ ئێمپراتووری بابێل و دواتریش لە وڵاتی بریتانیا لە ساڵی 1472ی زایینی و لە سەدەكانی دواتریش لە ساڵی 1841ی زایینی لە ئامریكا وەك پیشە و سەنعەتێك هاتە ئاراوە. لەم پیشە نوێیەدا كە هەموو تانوپۆكانی ژیانی سیاسی، كۆمەڵایەتی، ئابووری و كولتووری داپۆشی، لە ئامرازەكانی زمان، نووسراوە، وێنە، دەنگ، گرتەیی ڤیدیۆیی بۆ گەیشتن بە ئامانجە دیاریكراوەكان كەڵك وەرگیراوە. پڕوپاگەندە چەندە كاریگەر بووە لە شێوازی بەڕێوەبردنی كۆمەڵگا، ئەوەندەی دیكە كاریگەر بووە لەسەر ژیانی سیاسی و ڕەوتی بەرەو پێش چوونی ئەحزاب و ڕێكخراوە سیاسییەكان. كۆمەڵەیش وەك هەر حیزبێكی سیاسی هەر لەسەرەتای دەست بەكار بوونیەوە بەهەست كردن بەم زەروورەتە كە دەبێت بۆ گەیاندنی ڕوانگە و بۆچوونەكانی خۆی كەڵك لە ئامرازەكانی پڕوپاگەندە وەربگرێت. وەك حیزبێكی پێشەنگ و پێشكەوتوو هونەری لە سەردەمی خۆیدا پەرە پێدا و بۆ ئەم مەبەستە بە دانانی كۆڕی سروودی بانگەواز، لەم ڕێگایەوە هەوڵی دا هونەر و ئەدەبیاتێكی پێشڕەو، وەك ڕوتێكردنی نووسەران و شاعیرانێك كە دەست و قەڵەمیان، دەنگ و موزیكیان، شێعر و شانۆیان تا بەئەمڕۆ نەك لە كوردستانی ڕۆژهەڵات بەڵكوو سنوورەكانی تێپەڕاند و لەهەموو پارچەكانی كوردستان بینەر، بیسەر و خوێنەریان هەیە. ئەمەیش هەڵدەگەڕێتەوە بۆ ئەوەی چینی خوێندەوار و سەردەمیانە لە ئاستی بەرپرسایەتی و حیزبیدا بوون و بەچاوی بایەخ و گرینگیەكی تایبەتەوە چاویان لە تەبلیغات كردووە. چوون هەم لە ڕێگای شێعر، ئەدەبیات، موزیك، پەخشان و سروودەكانەوە كۆمەڵە توانی كاریگەر بێت لەسەر درووست كردنی گوفتمانێك كە كۆمەڵەی پێ ناسراوەتەوە.
پرسیار: كۆمەڵە لەبەر ئەوەی ناتوانێت بە شێوەیەكی یاسایی لە ناوخۆی كوردستانی ڕۆژهەڵاتدا چالاكی سیاسی و تەبلیغات بكات لە ڕوانگەی ئێوەوە كۆمەڵە چەندە توانیویەتی لە دەرەوەی كوردستانی ڕۆژهەڵاتەوە بە لەبەر چاوگرتنی ئەوەی كە خۆی خاوەن دەنگ و نەریت و پراتیكی تایبەتی خۆیەتی، لە ڕێگەی تەبلیغاتەوە پەرە بە خۆی و سیاسەتەكانی لەناو خەڵكدا بدات. بە گوتەیەكی دیكە سنوور و خاڵە لاوازەكانی تەبلیغات كامانەن؟.
وڵام: بەدرێژایی مێژوو و لە كۆنەوە تا دەگاتە ئەمڕۆ كە مێژووی دەسەڵاتی ڕژیم تەمەنی گەیشتوەتە 39 ساڵ، كۆمەڵە و ڕێبوارانی ڕێگا و ئامانجەكەی لە هەموو بۆنە حیزبییەكاندا سەرەڕای ئاستەنگ و هەموو لەمپەرەكان توانیویانە زاڵ بن بەسەر هەموو ئەو هێزە سەركوتگەرە ناوخۆیی و دەرەكیانەی كە لە كوردستاندا بوونی هەیە. بەپێی ئامارەكانی 3ساڵ پێش بۆ هەر8  تاكی كورد 1 مەئمووری ئەمنییەتی و سەركوتگەر لە كوردستان بوونی هەیە و بە لەبەر چاوگرتنی دۆخەكەیش، بەتایبەت لەم سەردەمەدا، ڕێژەی مۆرە و دەست و پێوەندەكانی ڕژیم زیاتر بووە و ئەمەیش ئامار و شاخێسەكانی گۆڕیوە.  لە پاڵ ئەمانەدا و بە تەرخان كردنی بوودجەی بەرفراوان و دابین كردنی بۆ ئەم مەبەستە هێشتا ڕژیم نەیتوانیوە پێش بە ڕەوتی بەرەوپێش چوونی چالاكی و هەڵسووڕانی تەبلیغاتیی هاوڕێیانی كۆمەڵە بگرێت. لەم سەردەمی بە جیهانی بوونەدا گەشەی كەرەستە و ئامرازەكانی پڕوپاگەندە و لەناو چوونی سنوورەكان وەرزێكی نوێی لە تێپەڕاندن و داگیركاریی مرۆڤەكان بۆ گەیاندنی پەیامی خۆیان هاتووەتە ئاراوە. وەرزێك كە لە سێبەری هەبوونی ئەو ئامرازانەی گەیاندن كە خێراییەكی بەرچاوی هەیە، هەموو بوارەكانی سیاسی، سەربازی، كۆمەڵایەتی نە بە زەبری چەك بەڵكوو بە زەبری سەدان ناوەندی ڕاگەیاندنی بەهێز و كۆمپانیا گەورەكانی ڕیكلام و پڕوپاگەندە وای كردووە كە نۆرم، ئەرزش و هەنجارەكانی كۆمەڵگا بەپێی ستراتێژی خاوەن میدیاكان ئاڵوگۆڕی بەسەردا بێت. جا ئەو ئاڵوگۆڕانە و ئەو ستراتێژانە هەم توانیویە كاریگەریی باش و كاریگەریی خراپیان هەبێت. بۆ وێنە میدیاكانی ڕژیم كە دەیان كاناڵی تەلەفیزیۆنی، سەدان ڕۆژنامە و گۆڤار بەشێوەی ئامانجدار كار لەسەر ئەوە دەكەن كە نەسڵی نوێی كۆمەڵگا، بنەماكانی كۆماری ئیسلامی بەپێی پێوانە و خواستەكانی خۆیان پەروەردە بكەن. ئێمە لەگەڵ دەزگای ڕاگەیاندنی بە هێزی لەو چەشنە بەرەو ڕووین كە تا ئێستا لەگەڵی بەشەڕ هاتووین. سەرەڕای ئەوەی ئێمە وەك كۆمەڵە لە ئێستادا میدیایەكی بەهێزی ڕاگەیاندنمان نییە بەڵام پێگە جەماوەریەكەمان، ڕابردووی پڕ لە شانازیی كۆمەڵە ئەو دەرفەتەی پێداوین كە لە ناوخۆی كوردستان لەسەر ئەو پانتایەی تێیدا خەبات دەكەین، جەماوەر بە شێوازێكی بەرین پێشوازی لە بڵاوكردنەوەی ڕوانگە فیكرییەكانی كۆمەڵە بكەن.
پرسیار: لە ڕوانگەی ئێوەوە جیاوازیی كاریگەریی كاری تەبلیغیی ئەم 26ی ڕێبەندانە، پەیامەكانی، سەردەمەكەی، دۆخی ئێران و... لەسەر خەڵك و بەدژی كۆماری ئیسلامیی ئێران چۆن لێك دەدەنەوە؟
وڵام: وەك جیاوازی ئەگەر بە كار و چالاكییەكانی تایبەت بە 26ی ڕێبەندان لە چەند ساڵ لەمەو پێشەوە ئاوڕێك بدەینەوە دەبینین كە هەر ساڵە و شێوازێكی نوێ لە كار و چالاكیی تێكۆشەرانی كۆمەڵە هاتوەتە ئاراوە. ئەو كەرەستە و ئامێرە تەبلیغاتییانەی ئەم ساڵ وەك ئاڵای كۆمەڵە، ئاڵای كوردستان، لۆگۆ و باجی سەر سینە كە لۆگۆی كۆمەڵە و وێنەی كاك فوئاد و ئەو پێنووسانەی كە لۆگۆی كۆمەڵە و ناوی كۆمەڵەی لەسەر بووە، بوونەتە ئۆلگۆ و ڕێنیشاندەر بۆ باقیی لایەنەكانی دیكە. وەك چۆن ساڵانی پێش ئێمە لە تەرەقەی ڕەنگی كەڵكمان وەر دەگرت. بۆ وێنە بەشداریی ژنان و كچان لە چالاكییەكان زیاتر لە ساڵانانی ڕابردوو بوو، بەشێك لە باشترین كارەكان ژنان و كچان خوڵقاندیان. ئەم ساڵ نەسڵی نوێی خەباتكاری كۆمەڵە ئەو چالاكیانەیان كردووە كە بۆ پۆلیس و هێزەكانی ڕژیم نامۆن و نەناسراوون. هەر بەو بۆنەوە لە هیچكام لە شارەكانی كوردستانی ڕۆژهەڵات هیچ كەس لە هاوڕێیانی ئێمە بۆ ڕژیم نە شناسایی كراوون و نە كەسمان لێ دەسبەسەر كراوە كە ئەمە دەسكەوتێكی مەزنە بۆ كۆمەڵە چونكە چ وەك پانتایی و چ وەك كەمی و كەیفی كارە تەبلیغیەكان باشتر و زیاتر لە ساڵان بوو. ئەو كارە تەبلیغاتیانەی ئەم ساڵ لە كەش و دۆخێكی ئەمنیی زیاتر لەساڵان بەڕێوە چوون لەبەر ئەوەی لە چەند حەوتووی پێش 26ی ڕێبەندانەوە چەندین خۆپیشاندانی گەورە لە شارەكانی ئێران و كوردستان بەڕێوە چووبوون و بۆ سەركووتی ناڕەزایەتییەكان ڕژیم كەوتبووە حاڵەتێكی ئامادە باشییەوە. سەرەڕای هەبوونی ئەو كەش و دۆخە ئەمنییە، لاوانی خەباتكاری كوردستان بە نووسینی درووشمەكانی، مەرگ بۆ دیكتاتۆر و بژی كۆمەڵە و پیرۆز بێت 26ی ڕێبەندان ڕۆژی كۆمەڵەیان هێنایەوە سەرزاران و دیسانەوە بە نەوەی نوێی كۆمەڵگای كوردستانیان ناساندەوە. لێرەدا جێگای خۆیەتی سپاس و پێزانین و ماندوو نەبوونی لە سەرجەم هاوڕێیانمان بكەم.

ئیدریس عەبدی

پرسیار: ئەم سەردەمە سەردەمی میدیا و تی ڤیە گەورە و زەبەلاحەكانە، پێتانوایە نەبوونی وەها تیڤی یان میدیایەكی بەهێز چەندە دەتوانێت زیان بە بزووتنەوە و حیزبە شۆرشگێڕەكان بگەێنێت؟
وڵام: بێ گۆمان نەبوونی میدیایەكی گەورە و پڕۆفیشناڵ و لە هەمان كاتدا میدیایەكی نەتەوەیی، زەرەر و زیانێكی زۆری گەیاندووە بە بزوتنەوەی كورد لە كوردستانی ڕۆژهەڵات. كاتێك كە میدیای دەوڵەتی لە چوارچێوەی سیاسەتە دەوڵەتییەكاندا كار دەكات و هەوڵ دەدات بۆ پاراستنی وەزعی مەوجود، كاتێك كە لە چوارچێوەی جوغرافیایی سیاسی ئێراندا بوونی میدیای سەربەخۆ ئەستەمە و ئەتوانم بڵێم كە نییە، كاتێك كە هەر كاربەدەست و بەرپرسێكی حكوومەت خۆی گرێداوە بە دەسەڵات و نیزامی سیاسیی كۆماری ئیسلامی و هەر چەشنە ڕەخنەگرتنێك لەلایەن میدیاكانی سەر بەلایەنەكانی دیكە لەم كەسایەتییانە وەكوو ئەوەیە كە ڕەخنەت لە نیزامی كۆماری ئیسلامی گرتبێت، كاتێك میدیاگەلێك كە بەناو پشتیوانی لەهیچ ڕەوت و فیكرێك و لایەنێك لەناو نیزامی كۆماری ئیسلامی ناكەن و لە دەرەوەی ئێرانن (بەڵام لەواقیعییەتدا وەها نییە)، كاتێك كە دەستێوەردانەكانی كۆماری ئیسلامی لەوڵاتانی ناوچەكە و تەنانەت لە كوردستانی باشووریش بەجۆرێك هەموو ئەو حكومەتانەی دەستەمۆ كردووە و میدیاكانی سەر بە حیزبە دەسەڵاتدارەكانی، ناوچەكە لەبەرامبەر بەهەموو ئەو كارەساتانەی كە لە ئێران و كوردستانی ڕۆژهەڵات ڕوو دەدەن بێدەنگن و ئەمە بەجۆرێك یارمەتیدانە بۆ سەركوتی زۆرتر و كپ كردنی دەنگی خەڵكی ئازادیخۆازی كوردستانی ڕۆژهەڵات، كاتێك كە بزووتنەوەیەكی كۆمەڵایەتیی بەهێز، لە كوردستانی ڕۆژهەڵات بوونی هەیە و لە زۆر بابەت و ڕووداودا كە لەم دوایانە لە كوردستانی ڕۆژهەڵات ڕوویانداوە و ڕووداوی بوومەلەرزەی كرماشان و كۆكردنەوەی یارمەتی بۆ لێقۆماوانی بوومەلەرزەی كرماشان و ناڕەزایەتی دەربرین بە كۆشتنی كۆڵبەران و پرسی سەربەخۆیی لە كوردستانی باشوور و...، بوونی ئەم بزووتنەوە كۆمەڵایەتییە بە هێزە دەسەلمێنن، بەڵام كاتێك كە میدیایەكی كوردیی بەهێز لە پشتی ئەم هەمووە چالاكییە مەدەنیانەوە نەبێت دەنگدانەوە و ڕەنگدانەوە و تەشەنەكردنی بۆ نێو ڕەگەكانی دیكەی كۆمەڵگا كەم و لاواز دەكاتەوە و ئەم خەڵكە چۆن بتوانن داخۆازیەكانی خۆیان باس بكەن و لە سنوورەكانی ئێران بیبەنە دەرەوە؟
بەهەموو ئەم بابەتانەی كە باسم كرد سەركوتێك كە لە نێو ئێراندا هەیە،گرتن و زیندانی كردنی ڕۆژنامەنووسان و مەجالدان بە ڕۆژنامەنووسانی سەربە دەسەڵات، بێدەنگیی  میدیا ناوچەیەكان لەبەرامبەر زوڵم و سەركوتی كۆماری ئیسلامی ئێران و لە وەها بەستێنێكدا كە ئێستا لە ئێراندا هەیە، (هەڵبەت پیشووتریش ئەم بەستێنە هەر بووە، بەڵام ئێستا بەستێن و هەلەكە زۆر گۆنجاوتر و لە بارترە) زۆر زۆر پێویستە كە میدیایەك سەر بە سیاسەتی شۆڕشگێڕانە ببێت، زۆرتر لەجاران، پڕۆفیشناڵانەتر، ڕاستگۆیانەتر لە گۆرەپاندا بوونی هەبێت و هەموو ئەو شتانەی كە نابێت بوترێت، بیڵێت و هەوڵ بدات بۆ زانیاری بەخشین و ئاگاداركردنەوە كۆمەڵگا. نەبوونی میدیای شۆڕشگێڕ دەتوانێت خەسارێكی گەورە بێت بۆ خەڵكی ئازادیخۆاز و بزووتنەوەی شۆڕشگێڕانەی كوردستانی ڕۆژهەڵات
پرسیار: دەور و زەرفیەت یان توانستی تۆڕە كۆمەڵایەتییەكانی وەك فەیسبووك، تێلێگرام، ئینستاگرام و... لەسەر بزووتنەوە و حیزبە شۆڕشگێڕەكان دژی حكوومەتێكی وەك كۆماری ئیسلامیی ئێران چۆن دەبینن؟
وڵام: لەسەر دەور و كاریگەریی تۆڕە كۆمەڵایەتییەكان كاریگەریی هەیە و پێم وابێت كەس نییە بتوانێت حاشا لەمە بكات بەڵام بەباوەری من بوونی میدیاییەكی واقیعیی (نەك مەجازی)، و هاوكات كاركردن لە تۆڕە كۆمەڵایەتییەكان دەتوانێت كاراتر و باشتر بێت. هەروەك دەزانن ئینتێرنێت لە ئێران زۆر بەربەستی لەسەرە و خەڵكی ناوخۆی ئێران بە جۆرێك كار و بەرهەمی میدیا شۆڕشگێڕەكان نابینین مەبەستم ئەو میدیانەی كە تەنها لە تۆڕە كۆمەڵایەتییەكاندا چالاكن. پاشان تۆڕە كۆمەڵایەتییەكان وەك تەلەفزیۆن گشتگیر نییە. بەڕای من گەیاندنی دەنگی حیزبە شۆڕشگێڕەكان لە ڕێگای تۆڕە كۆمەڵایەتییەكانەوە زۆر لاوازە. لەلایەكی دیكەوە بەهۆی كێشەی ئەمنییەتییەوە لەوانەیە خەڵك نەوێرن ئەپڵیكەیشنێكی میدیایەكی شۆڕشگێڕ لەسەر موبایلەكانیان دانێن یان تەنانەت مێمبرزی كاناڵێكی تێلگرامی ببن كەسەر بە میدیای حیزبێكی شۆڕشگێڕە. لە كۆمەڵگایەكی دێمۆكراتیكدا لەوانەیە تۆڕە كۆمەڵایەتییەكان بتوانێت بەتەنهایی كاریگەریی خۆی ببێت بەڵام لە كۆمەڵگای ئێراندا بەهۆی سەركوتی زۆر و تەفتیشی بیروڕا و دەستێوەردانی دەسەڵات لە هەموو بوارەكاندا تەنانەت ژیانی ئاسایی خەڵكیش ئەستەمە كە تۆڕە كۆمەڵایەتییەكان بتوانن بە ئاسانی كاریگەریی خۆیان دابنێن. لە وەها هەلۆمەرجێكدا تۆڕە كۆمەڵایەتییەكان بۆ كاری ڕێكخستنی ناوخۆیی دەتوانێت كاریگەریی هەبێت بەڵام وەكوو ئەوەی كە كاری میدیایی بكرێت بەڕای من ئەستەمە كە بەدڵنیاییەوە بڵێین دەتوانن كاریگەریی گشتگیرتر و باشتر دابنێن.
میدیاكانی حكومەتی كۆماری ئیسلامی ئێران چ ئەوانەی كە پەخشی ناوخۆییان هەیە و چ میدیاگەلێك كە لە پانتایی سەتەلایت لە هەموو جیهان بە چەندین زمان خەریكی پاراستنی بەرژەوەندییەكانی كۆماری ئیسلامین لەبەرامبەر تۆڕە كۆمەڵایەتییەكان كە لە ئێستادا تەنها كەرەستەی بەردەستی حیزبەكانی كوردستانی ڕۆژهەڵاتن، زۆر بەهێزترن و كاریگەریان زۆرترە. لەلایەكی دیكەوە، پێشكەوتنی تۆڕە كۆمەڵایەتییەكان بۆنموونە ئیمكانی ڕاستەوخۆ بڵاكردنەوە ویدیۆ لە فەیسبووك و ئینستاگرام و تویتەر، مەفهوومی تەلەفزیۆنی ئینتێرنێتی تووشی كێشە كردووە. لە كاتێكدا هەر كەسێك لە هەر شوێنێك كە پێی خۆش بێت دەتوانێت چەندین كاتژمێر ڤیدیۆ بڵاوبكاتەوە و خەڵكی ناوخۆیی ئێرانیش بەبێ ترسی ئەمنییەتی دەتوانن بیبینن. كەواتە، مەفهوومی تەلەفزیۆنی ئینتێرنێتی بۆ حیزبە شۆڕشگێڕەكان تووشی كێشە بووە و ناتوانن پشتی پێ ببەستن.
یەكێك لەتایبەتمەندییەكانی بڵاوكردنەوەی بابەتەكان بەتایبەت وتار و ویدیۆ لە تۆڕەكۆمەڵایەتییەكان، مینی ماڵ بوونیانە كە زۆربەی میدیاكان ئەوە لەبەرچاو ناگرن. خوێندنەوە وتارێكی درێژ و ویدیۆیەكی درێژ ماوە لە تۆڕە كۆمەڵایەتییەكان پێم وانییە لاینگرێكی ئەوتۆی ببێت. بۆنموونە، ڤیدیۆییەكی درێژ بۆ بینین لەلایەن بەردەنگەكانییەوە پێویستی بە قەبارەیەكی ئینتێرنێتیی زۆرتر هەیە تاكوو ڤیدیۆییەكی كورت. بۆ وتارە درێژەكانیش خەڵكی بەگشتی لەگەڵ خوێندنەوە كێشەیان هەیە. ڕێژەیەكی زۆر كەم لە خەڵك ئامادەن كە وتارە درێژەكان كە لە تۆڕە كۆمەڵایەتییەكان بڵاو دەكرێتەوە بخوێننەوە.
پرسیار: نەبوونی تی ڤییەكی بەهێز بۆ كۆمەڵە و بەشێكی بەرچاوی حیزبەكانی كوردستانی ڕۆژهەڵات یەكێك لە كەلێنە گەورەكانە ئایا لە ڕوانگەی ئێوەوە تۆڕە كۆمەڵایەتییەكان چەندە توانیویانە ئەو كەلێنە پڕ بكەنەوە؟
وڵام: تۆڕە كۆمەڵایەتییەكان ناتوانن جێگای تەلەفزیۆن و ڕۆژنامە و كتێب بگرنەوە هەروەها كەپێشتر ئاماژەیشم پێدا هەر كامەیان كاركردێكی جیاوازیان هەیە. پێم خۆشە لێرەدا ئاماژە بەو بدەم ئەوەی كە ئێستا پەخشی تەلەفزیۆنی ڕۆژهەڵات لە سەتەلایت وەستاوە نیشانەی ئەوە نییە كە كۆمەڵە هەست بەو پێویستییە ناكات بەڵكوو بەپێچەوانەوە كۆمەڵە هەمیشە هەستی بەوە كردووە دەبێت تەلەفزیۆنی ببێت. هەر ئەم هەست بە پێویست بوونە بوو كە وای كرد كۆمەڵە یەكەمین تەلەفزیۆنی كوردی ئۆپۆزیسیۆن لە ئێران دابمەزرێنیت بەڵام بەداخەوە ئێستا بەبۆنەی ئەو قەیرانە داراییەی كە هەموو ناوچەكەی گرتووەتەوە و كۆمەڵەیشی گرتووەتەوە تەلەفزیۆنی ڕۆژهەڵات پەخشی ڕاوەستاوە.
كۆمەڵە لەهەموو قۆناخەكانی خەباتی ڕزگاری خۆازیی گەلی كورد لە كوردستانی ڕۆژهەڵات لە پێشكەوتووترین ئامرازەكانی ڕاگەیاندن، لە ڕابردوودا هەر لە ڕۆژنامە دیواری و شەونامە و نامیلكەوە بگرە تاكوو میدیۆمە سەردەمییەكانی وەك كتێب  و ڕۆژنامە و ڕادیۆ و تەلەفزیۆن و ئینتیرنیت بۆ خزمەت بە گەلی كورد كەڵكی باشی وەرگرتووە. بەم پێیە، نەبوونی تەلەفزیۆن بۆ كۆمەڵە لە داهاتوودا دەتوانێت خەسارێكی گەورە بێت و كۆمەڵەیش كەمتەرخەم نییە لەبەرامبەر بەم پرسە و ئێستا خەریكی تاوتوێ كردنی دانانەوەی تەلەفیزیۆنە و لەداهاتوویشدا بەكردەوە هەنگاو هەڵدەگرین بۆ كردنەوەی دووبارەی تەلەفزیۆنی ڕۆژهەڵات. 
من پێم وابێت سەردەمی بیركردنەوە لە تەلەفزیۆنێكی ڕووتی حیزبی و تایبەت بە كۆمەڵە لەلای سەركردایەتیی كۆمەڵە كۆتایی پێهاتووە. هەر لەماوەی یەك دوو ساڵی دواییدا، سەركردایەتیی كۆمەڵەی شۆڕشگێڕ چەندین جار پێشنیاری بە هەموو حیزب و لایەنە سیاسییەكانی كوردستانی ڕۆژهەڵات داوە كە هەموومان پێكەوە تەلەفزیۆنێكی گەورەتر، پڕۆفیشناڵاتر و نەتەوەیی دابمەزرێنین. من پێم وابێت ئەمە درووسترین كاری مومكینە كە هەموو حیزبەكانی كوردستانی ڕۆژهەڵات دەتوانن ئەنجامی بدەن هەم لە باری ئابووری و هەم لەباری هێزی ئینسانی و هەم لە باری سیاسیشەوە ئەم یەكگرتووییە دەتوانێت دڵخۆشكەرتر و كاریگەرتر بێت. بەڕاستی بوونی تەلەفزیۆنێكی نەتەوەیی و بەگشتی تۆڕێكی میدیایی نەتەوەیی لە بزووتنەوەی ڕزگاری خۆازیی گەلی كورد لە كوردستانی ڕۆژهەڵات جێگای زۆر زۆر خاڵییە. بەگشتی، كاركردی جیاوازی هەر كام لەو میدیۆمانەی كە باسم كرد ناتوانێت كەلێنەكان پڕ بكاتەوە نە تۆڕە كۆمەڵایەتییەكان دەتوانن جێگای تەلەفزیۆن  و ڕۆژنامە و كتێب بگرنەوە نە تەلەفزیۆن و ڕۆژنامە و كتێبیش دەتوانن جێگای تۆڕە كۆمەڵایەتییەكان پڕ بكەنەوە.
  


PM:09:23:11/03/2018




ئه‌م بابه‌ته 409 جار خوێنراوه‌ته‌وه‌‌


زۆرترین خوێنراو‌