بە بیانووی دیاری كردنی بەربژێرانی سەرۆك كۆماری لە ئێران

 فۆئاد شێربەیگی

شوڕای نیگابانی یاسای بنەڕەتی كۆماری ئیسلامی لە ئێران ناوی ئەو بەربژێرانەی خولی دوازدەی سەرۆك كۆماری كە لە لایەن ئەو ئۆرگانەی رژیمەوە پەسەند كراون بۆ ڕای گشتی ڕاگەیاند و ناوی ئەحمەدینیژاد و بەقایی تێدا نەبوو.
ئەو كەسانەی شیاویان لە لایەن ئۆرگانی چاودێری هەڵبژاردنەكان و دەزگای بەڕێوەبەری فەرمانەكانی رەهبەری كۆماری ئیسلامی لە ئێران پەسەند كراوە بریتین لە:
1.ئێسحاق جەهانگیری
2.مستەفا میرسەلیم
3.مستەفا هاشمی تەبا
4.حەسەن ڕووحانی
5.ئیبراهیم یۆنسی
6.محەممەد باقر قالیباف
باوەكوو پێشبینی ئەوە دەكرا ئەحمەدی نیژاد و كۆرپە ئازیزەكەی واتە بەقایی شیاویان لە لایەن شوڕای نیگابانەوە پەسەن نەكرێت بەڵام ئەو شێوەیە لە دوو جەمسەری كردنی هەڵبژاردنەكان لە نێوان بەربژێرەكاندا شتێكی چاوەڕوان نەكراو بوو و زۆر كەس پێیان وابوو خواستی رەهبەری ئێران دەبێ بەرەو دابەشكردنی دەنگەكانی ئیسلاحخوازان بە پەسەند كردنی شیاوی چەند كەس لەو لایەنەوە ببێت تا بكرێ ئیبراهیم ڕەئیسی وەكوو كەروێشكی ناو كڵاوی سیركەكە لە هەڵبژاردنەكاندا سەركەوتوانە دەرخەن بەڵام ڕێك بە پێچەوانە دیارە كە بە بوونی قالیباف و ڕەئیسی و تا ڕادەیەكیش مستەفا میرسەلیمی سەر بە باڵی پاوانخواز ئەوە ئەو باڵەیە كە ئەگەری دابەش بوونی دەنگەكانی بەسەردا زاڵە لەبەر ئەوەی جەهانگیری سەر بە كارگوزارانی سازەندەگی و هاشمی تەبای پشتیوانی پێشوی موسەوی ناتوانن كاریگەرییەكی ئۆتۆیان لەسەر دابەش بوونی دەنگی ئیسلاحخوازان و پشتیوانانی میانەڕەوی ڕووحانی ببێت و ڕەنگ بێ ئەوەش بەلای زۆر كەسەوە سەیر ببێت.
ئەو پێكهاتەیە دەرخەری دوو سیناریۆیە بەلای منەوە یەكەم ترسی رژیم لە بەشداری نەكردنی بەربڵاوی خەڵك لەو شانۆگەرییەدا بە تایبەت لەلایەن نەیارانی باڵی پاوانخوازەوە كە لە دەنگەكانی ڕووحانی كەم دەكاتەوە و لە ئەگەری ئەوەدا پێویستی ڕژیم بە حكومەتێكی سەركووتگەر بۆ هەڕەشە و گوڕەشە دژ بە خەڵك و ترساندن و كوشتن و بڕین لە لایەن كەسێكی دژە مڕۆڤەوە وەكوو ڕەئیسی چاوەڕوانكراوە و سەركەوتوو ڕاگەیاندنی ناوبراویش لە لایەن بەربژێرانی باڵی پاوانخواەوە كاردانەوەیەكی لێناكەوێتەوە و ڕووحانیش لەوە دەستەمۆترە كە لە ئەگەری بوونی وەها هەڕەشەیەك لەسەر ڕژیم بیكا بە هەراوهوریا و ڕەنگبێت بە لەبەرچاوگرتنی بەرژەوەندی ڕژیم یەكەم كەسیش بێت لەوەها ئەگەرێكدا پیرۆزبایی بە ڕەئیسی بڵێت.
سیناریۆی دووهەم بەشداری خەڵك وەك جاران بەهەر بیانویەكەوە لە هەڵبژاردنەكانە ڕەنگبێت بە فێڵ ە پروپاگەندەش وەكوو حیماسەیەك نەتەوەییش پێناسەی بۆ بكردرێت كە هیوایەتی ڕژیمە و سەركەوتنی ڕووحانی نەرم و نیانی لێدەكەوێتەوە و ئەو دیاردەیەش بەلای ڕۆژئاوا و بەتایبەتی ئەمریكاوە پەسەندە و پێویستییەك بە كاردانەوەی زۆر تووندتر ئەوان لە داهاتوودا ناكا و بۆ دەكرێ بە سیاسەتێكی هەڕەشە و وەعدە بكرێت لەگەڵ رژیمی حكومەتی داهاتووی ئێران دانوستان بكرێت و هیوادار بن سەرهەڵدانی جەماوەری لێنەكەوێتەوە و خەونی بەدینەهاتووی باشبوونی ژیانی كۆمەڵانی خەڵكی ئێران سڕكەری جەماوەر بێت و پێش بە تێكچوونی بارودۆخەكە بگرێت.
خەڵكی ئێران دەبێ ئەوە باش بزانن كە سەرەڕای ئەوەی كە ڕەئیسی دۆستی نزیك خامنەییە بەڵام هاتنی بۆ ڕكابەرییەكانی هەڵبژرادنەكانی سەرۆك كۆماری سیناریۆیەكی چەن لایەنەیە لە هەنگاوی ئەوەڵدا وەكوو هەموو سیستمە پاوانخوازەكان بۆ ترساندنی خەڵك بۆ بەشداری بەربڵاو لە ترسی ناوبراو و بە بیانوی هەڵبژاردنی خراپ لە خراپتر عاقڵانەترە كە تاكتیكێكی كۆنی دیكتاتۆڕەكانە بۆ گەمەی دیمۆكراسی ڕواڵەتی وگەوجاندنی جەماوەر و هەنگاوی دووهەمدا بۆ بەڕێوەبردنی دەزگای سەركووتی بەربڵاو و دڕەندانە لە كاتی سەرهەڵدانی خەڵكیدا بەدەستی جەللادێكی بە ئەزموون و باوەڕپێكراو كە مەترسی گۆڕایەلنەبووون و نەرم و نیانی لەسەر نابێت بەڵام ئەوەمان لەبیر بێت هەتا سەرهەڵدانی خەڵك و دەربڕینی نارەزایەتی دژ بە ڕژیم زووتر بكردرێت تێچوووی كەمتر دەبێت و ئەگەری تەسلیم بوون و ڕووخانی قەڵای دیكتاتۆڕییەت زیترە و كەم تێچووترین چارەسەریش بایكۆتی هەڵبژاردنەكان و بەشداری نەكردنی جەماوەرە لەو شانۆگەرییەی ڕژیم و لێستاندنەوەی رەوایی دەسەڵاتدارێتی لەو دەوڵەتەیە كە دەبێتە هۆی قوولتر بوونەوەی كێشەكانی ناوخۆیان و هەروەها پشتیوانی جیهانیش بۆ بزووتنەوەی دیمۆكراسیخوازی لە ئێران زیاتر دابیندەكات و هەنگاوێك بۆ دەربازبوون ئێران و دانیشتوانی لە دەستی دێوەزمەی كۆماری ئیسلامی نزیكترمان دەكاتەوە وئاسۆی بەدیهاتنی ئاوات و ەونەكانمان ڕوونتر و نزیكتر دەبێت.


PM:11:42:21/04/2017




ئه‌م بابه‌ته 623 جار خوێنراوه‌ته‌وه‌‌


زۆرترین خوێنراو‌