بیست و هەشتی گەلاوێژ، رۆژی بەرەنگاری نەتەوەیی خەڵكی كوردستانە

بیست و هەشتی گەلاوێژ، رۆژی بەرەنگاری نەتەوەیی خەڵكی كوردستانە


عەبدوڵڵا موهتەدی

سی و هەشت ساڵ لەوە پێش لە وەها رۆژێكدا ئایەتوڵڵا خومەینی، بەبێ پرس كردن بە سەرۆك وەزیری ئەو كات و شورای ئینقیلابەكەی خۆیان و فەرماندە نیزامییەكانی ئێران، فەرمانی هێرشی بۆ سەر كوردستان دەركرد. فەرمانی هێرشەكەی خومەینی تاوانكارانە و بیانووەكەشی ساختە و پڕوپووچ بوو. بەقسەی ئەو ژنانی موسوڵمان لەلایەن كوردە كۆمۆنیستەكانەوە لە مزگەوتی جامیعەی سنە بە بارمتە گیرابوون و دەبوو هەموو هێزی نیزامی و هەموو موسوڵمانێكی راستەقینە لە هەموو ئێرانەوە هێرش بەرێتە كوردستان و بچێتە هانای ئەو بارمتانەوە و رزگاریان بكا.


ئەم درۆ شاخدارە، كە دواتر خودی بازرگان لە كتێبی (انقلاب ایران در دو حركت)دا بەئاشكرا دەڵێ ناڕاست بوو، هەرگیز لەلایەن خۆشیانەوە پەیگیری نەكرا: كەس نەیزانی داخۆ ئەو خانمە بەبارمتە گیراوانە رزگار كران و ئەگەر رزگاریان بوو، ئەی بۆ سی و هەشت ساڵ دوای ئەوەیش داگیركاری كوردستان هەر كۆتایی پێنەهاتووە؟ لەڕاستیدا، مەبەست هەڵخڕاندنی هەستی ئایینی كۆمەڵانی بێ ئاگای خەڵكی ئێران و سازدانی مەكینەیەكی داپڵۆسێنەری پێكهاتوو لە هێزی چەكداری كلاسیكی تەیار بە تۆپ و تانك و تەیارە وێڕای لەشكرێكی هەڵخڕاوی هەڵخەڵەتاوی وەحشی و نەفام بوو كە لە هیچ جینایەت و تاوانێك سڵ نەكا، خوێنی كورد بە حەڵاڵ بزانێ و لە چەشنی پێشینیانە سەفەوییە دڕندەكانیان كوردستانی ئازاد و ئازادیخواز داگیر و كاول و خاپوور كا.

بەڵام كورد نەفەوتا و ئەوان شكان. سێ مانگی پێنەچوو كە فەرمانی هێرش بوو بە پەیامی ئاشتی و (هیات حسن نیت) رەوانەی كوردستان كرا كە بۆخۆی باسێكی جیاوازە و لێرەدا لەسەری ناڕۆم. دەمەوێ بڵێم كورد بە بەرەنگاری خۆی لە فەوتان رزگار كرد، نەسلی شۆڕشگێڕانی ئەو سەردەمە بە رێكخستنی خۆبەخشانەی ئەو بەرەنگارییە نەتەوەییە، بە رێكخستنی خەباتی مەدەنی و بەرخۆدانی جەماوەری، بە رێكخستنی هێزی پێشمەرگە و بەخشینی خوێن، سەرورییەكی گەورەیان بۆخۆیان و بۆ هەموو گەلی كورد تومار كرد. خوێن رژا، رۆڵە كوژا، ئەمما دەرسێكی گەورەش بە داگیركەران درا و ناو و ناوبانگ و رووسوورییەكی گەورەش بۆ هەمیشە لە مێژووی كورد تومار كرا. ئەگەر نەسلی نوێی كوردی رۆژهەڵات ئەمڕۆ سەری بەرزە و بەشانازییەوە چەكی پێشمەرگایەتی دەكاتە شان، ئەگەر لاوانی كوردستان هەستی غورور و بڕوا بەخۆبوونیان بەردەوام لە هەڵكشان دایە، ئەگەر بزوتنەوەی رزگاریخوازی كوردستان نافەوتێ و بەهیچ زەبر و زەنگێك دانامركێ، هەمووی بەرهەمی بڕیاری مێژووسازی ئەو بەرەنگارییە نەتەوییەیە كە سی و هەشت ساڵ پێش ئەمڕۆ و رێك بەدوای فەرمانی هێرشی كۆماری ئیسلامیدا درا.


ئەو وەختیش و ئێستاش هێزە سەركوتگەرەكانی كۆماری ئیسلامی بە ژمارە، بە چەك و چۆڵ، بە راهێنان و هەر وەها بەسەرچاوەی دارایی سەدان قات لە هێزی پێشمەرگە تەیارترن. ئەو كات و ئێستاش وەكوو تێرۆریستی ترسنۆك دەستیان وەشاندوە و قورباییان لێ گرتووین. بەڵام لە رووی كۆمەڵایەتی و مرۆییەوە، ئێمە ئەوانمان گەمارۆ داوە. كۆماری ئیسلامی و هێزەكانی وەكوو ژمارەیەك دوڕگەی بچووكی ناو ئوقیانووسێكی دە میلیۆنی كورد لە ئێران وان، مەددێكی ئەو ئوقیانووسانە دەتوانێ هەموو ئەو جزیرانە بۆ هەمیشە نوقمی بن گۆم بكا. هەموو هەوڵێك، هەموو ماندوو بوونێك، هەموو خەباتێك لەوانە خەبات و چالاكیی پێشمەرگانەش، دەبێ بۆ هەستانی ئەو ئوقیانووسە گەورەیە تەرخان بكرێت.


لەسەر دایك و باوكان و گەورەكانی بنەماڵەكانیشە كە رۆژی ٢٨ی گەلاوێژ وەكوو رۆژی بەرەنگاری نەتەوەیی بە منداڵەكانیان بناسێنن و رێزگرتن لەو بەرەنگارییە بكەن بە نەریتی گەورە و بچووكی هەموو بنەماڵەكان.